Það er mjög mikilvægt að börn fái góða aðlögun og jákvæða upplifun af heimsókn til tannlæknis. Við leggjum okkur fram við að láta börnum líða vel og kennum þeim góða tannumhirðu enda er það best forvörnin til lengri tíma. Það er mikilvægt að börn læri að hugsa vel um tennurnar sínar og að reglulegar tannlæknaheimsóknir séu sjálfsagður hlutur og ekkert til að óttast. 

Við bjóðum upp á ýmiskonar afþreyingu meðan á tannlæknaheimsókn stendur eins og t.d. heyrnartól til að hlusta á tónlist og sögur og gleraugu til að horfa á teiknimyndir. 

Miðað er við að börn komi í sína fyrstu heimsókn til tannlæknis um þriggja ára aldur en fyrr ef eitthvað er talið vera að. Fyrsta heimsóknin fer í að kynnast umhverfinu, tannlækninum og starfsfólki ásamt því að staðan er metin. Næst er komið á reglulegum heimsóknum þar sem forvarnir eru í fyrirrúmi.  

Tannlausir einstaklingar þurfa á heilgómum að halda í efri og/eða neðri góm.

Algengt er að gómarnir losni, sér í lagi sá neðri. Ný tækni er í boði sem felur í sér að gómarnir eru studdir af tannplöntum. Gervitennurnar smella þá á tannplantana og sitja því mun fastar og hreyfast minna við tyggingu og tal. Fastari gervitennur veita einstaklinginum mun meiri lífsgæði.

Ef þú telur þetta vera eitthvað sem þú þarft á að halda biðjum við þig um að hafa samband við okkur og panta tíma. Það er erfitt að segja til um verð þar sem það getur verið misjafnt eftir því hvað þarf að gera. Besta lausnin er að fá viðtal hjá tannlækni og mun hann meta stöðuna.

Við daglega burstun tanna náum við ekki alltaf að fjarlægja alla tannsýklu sem safnast á tennur og ef tannsýklan fær að vera myndast tannsteinn. Tannsteinn samanstendur af sýklum, bæði lifandi og dauðum, í kalkmassa sem þarf að fjarlægja.

Tannsteinninn veldur bólgum í tannholdi sem aftur getur valdið því að tennur losna. Því er mikilvægt að fara reglulega til tannlæknis eða tannfræðings í tannhreinsun til að viðhalda heilbrigði munns og tanna.

Invisalign er nýleg tækni sem er notuð til tannréttinga. Það hentar í minni háttar tilfellum þar sem þarf að leiðrétta skekkjur og bit. Auk þess er þetta mikið notað í fegrunartannlækningum.

Invisalign tæknin felst í notkun góma þar sem hver og einn er notuður í ákveðinn tíma og er svo skipt út fyrir næsta þar til skekkja/bit hefur verið lagfært. Fjöldi góma getur verið frá 7-30 stk og er hver og einn yfirleitt notaður í 7-12 daga eða samkvæmt fyrirmælum tannlæknis. 

Lýsingu á tönnum er hægt að framkvæma með ýmsum hætti. Algengast er að lýsa tennur heima en til þess eru notaðar eru mjúkar plastskinnur sem laga sig að tönnunum. Lýsingarefni er sett í skinnurnar og þær hafðar í 30 mín til 2 klst. Mislangan tíma getur tekið að ná þeim árangri sem einstaklingurinn sækist eftir en yfirleitt tekur ferlið 7-10 daga. Panta þarf tíma fyrir gerð lýsingarskinnu, en það tekur stutta stund og er hún yfirleitt tilbúin samdægurs eða degi síðar.

Nauðsynlegt er að fólk fari í tannhreinsun hjá tannlækni eða tannfræðing fyrir lýsingu. Ef ekki er farið í tannhreinsun getum við ekki ábyrgst það að lýsingin muni ná nokkrum árangri. Við bendum á að kaffidrykkja, reykingar, rauðvín og annað matarkyns eða drykkjar sem litar hefur slæm áhrif og dregur úr virkni lýsingarinnar. Við bendum fólki því á að passa það eftir lýsingu.

Þegar tennur eru mjög illa farnar getur verið gott að setja á þær krónur en krónur eru hettur sem settar eru yfir tannbein á tönnum. Einnig eru krónur notaðar á tannplönt. Krónur líkja eftir heilbrigðum tönnum og er liturinn valin eftir því sem passar hverjum og einum. Krónur geta verið úr gulli eða postulíni. Í tannlaus bil er hægt að bæta tönn í með því að gera brýr.

Til þess að gera fallegar krónur og brýr þarf færa tannsmiði og erum við í góðu samstarfi við tannsmiði hjá Bakkabrosi. Brostu og Bakkabros eru í sama húsnæði og er mjög góð samvinna þar á milli, enda er það nauðsynlegt til að tryggja góðan árangur.

Hér má sjá góð dæmi um einfalda krónugerð, Páll Ævar tannlæknir sá um þetta ásamt Bakkabros

Líffæri tannar (taugar, æðar og frumur) búa í holi tannarinnar og þegar tönn verður fyrir áfalli, til að mynda tannskemmdum, geta bakteríur komist þar inn. Við þetta getur tönn dáið smám saman en þá þarf að rótfylla. Líffæri tannarinnar og bakteríur eru þá hreinsuð í burtu og gúmmíkent efni sett í staðin í rótarhol hennar. Þetta ferli kallast rótfylling.

Þegar skemmd hefur komið í tönn, þá þarf að fjarlægja sýktan tannvef og fylla upp í holuna sem eftir situr. Helstu tannfyllingarefnin eru plastefni og postulín. Í dag eru plastfyllingarefni mest notuð en þau eru hvít á litinn og líkjast því tönninni. Gæði þessara efna hefur aukist jafnt og þétt og þykja góður kostur í dag. Postulíns fyllingar eru samlitar tönninni og eru mikið notaðar.Postulín er hart efni eins og glerungur og hefur reynst einstaklega vel. Auk þess er notað gull og Amalgam (silfur) í einstaka tilfellum. 

Sumir óttast að fara til tannlæknis og er það hvorki óalgengt né óeðlilegt. Við höfum mörg úrræði til að gera heimsóknina sem þægilegasta og hjálpa þér að sigrast á óttanum. Þær aðferðir sem við bjóðum meðal annars upp á eru:

• Sefjun með lyfjum
• Glaðloft
• Svæfingar

Í fyrsta tíma er átt gott samtal við tannlækni þar sem staðan er metin og framhaldið metið með tilliti til þarfa einstaklingsins. Viðskiptavinir geta fengið teppi, faðminn (ýttu hér til að sjá hvað faðmurinn er), sjónvarpsgleraugu, tónlist og heita grjóna púða á axlirnar. Ekki hika við að spyrja starfsfólk um það sem þú telur að hjálpi þér að líða sem best í heimsókn þinni. Umfram allt leggjum við þó upp úr þægilegu viðmóti, fræðslu og góðu sambandi við sjúklinginn.

Með tannplöntum þarf tannmissir ekki að vera viðverandi vandamál. Tannplanti er skrúfa sem er gerð úr titanmálmi. Tannplantinn er settur í kjálkabeinið með skurðaðgerð. Hann þjónar sem "rót" fyrir nýja tönn. Á tannplanta má byggja tannkrónur, brýr, heila tanngarða og festa gervitennur með smellum.

Það er nær ómögulegt að sjá muninn á tannplantatönnum og náttúrulegum tönnum:

• Þær nýtast á sama hátt, veita sömu tilfinningu og líta eins út.
• Þær virka sem eigin tennur þegar þú tyggur, brosir eða talar.
• Þær eru þægilegar og sitja fastar.
• Þær þarf ekki að festa við nágrannatennurnar og því þarf ekki að slípa af heilbrigðum tönnum.

Stundum þarf að fjarlægja tennur af ýmsum ástæðum t.d. vegna plássleysis, mikilla skemmda og tannholdssjúkdóma. Þegar tennur eru fjarlægðar vegna skemmda eða tannholdssjúkdóma er öðrum úrræðum yfirleitt beitt til þess að byggja upp tannlausa svæðið t.d. með tannplöntum eða lausum tanngervum. Þannig er tryggt að tanntaka hafi sem minnst áhrif á getu og útlit einstaklings. 

Svefnvandamál eru ekki óalgeng og geta haft mikil áhrif á líkamann í heild. Við bjóðum upp á hrotugóma sem hafa þau áhrif að færa fram neðri kjálka þegar fólk sefur. Þannig helst öndunarvegurinn opinn og minnkar bæði hrotur og kæfisvefn. Þetta úrræði er einstaklingsbundið og þarf læknir/tannlæknir að meta kosti þess og áhrif á svefngæði hvers og eins. 

Gnístur er algengt vandamál í nútímasamfélagi. Algengasta orsök gnísturs er spenna í taugakerfinu og veldur það mikilli virkni vöðva sem leiðir til vöðvaspennu, bólgu, verkja og slits á tönnum til lengri tíma. Við bjóðum upp á þverfaglegt meðferðarúrræði sem felst í sjúkraþjálfun, nuddi, nálastungum, streitustjórnun og smíði á gnístursgómum. Gnístursgómar létta álag á tönnum og vöðvum. Með þessari heildrænu meðferð er hægt að lágmarkað óþægindi og neikvæð áhrif gnísturs á líkamann.